🇲🇲 DIGITAL COUP QUARTERLY ( February 2022 to April 2022)

 ၂၀၂၂ ခုနှစ် ဖေဖော်ဝါရီလမှ ဧပြီလအတွင်း ကြုံတွေ့ခဲ့ရသည့် ဒီဂျစ်တယ် ဖိနှိပ်မှုဆိုင်ရာဖြစ်စဉ်များ

၂၀၂၂ ခုနှစ် ဖေဖော်ဝါရီလတွင် မြန်မာနိုင်ငံ စစ်အာဏာသိမ်းမှု၏ တစ်နှစ်ပြည့်မြောက်ပြီး ဒုတိယမြောက်နှစ်ထဲသို့ စတင်ဝင်ရောက်လာပြီဖြစ်သည်။ စစ်ကောင်စီသည် အာဏာသိမ်းမှု စတင်ပြီးချိန်မှ စ၍ ဒီဂျစ်တယ်ရပ်ဝန်းဆိုင်ရာ ဖိနှိပ်မှုများကို ပြုလုပ်လာခဲ့ပြီး ၂၀၂၂ ခုနှစ် ဖေဖော်ဝါရီလမှ ဧပြီလ အတွင်း အာဏာသိမ်းမှု တစ်နှစ်တာကာလ လွန်မြောက်ပြီးနောက် ဒုတိယနှစ် ပထမ သုံးလပတ်ကာလအတွင်းတွင်လည်း ဒီဂျစ်တယ်ဖိနှိပ်မှုများ ဆက်လက်ဖြစ်ပေါ်နေသည်ကိုတွေ့ရသည်။ ယခုဆောင်းပါးတွင် ၂၀၂၂ ခုနှစ် ဖေဖော်ဝါရီလမှ မတ်လအတွင်း မြန်မာနိုင်ငံသားများ ကြုံခံရရသည် ဒီဂျစ်တယ်ဖိနှိပ်ခံရမှု အခြေအနေများအား စုစည်ဖော်ပြပေးသွားမည်ဖြစ်ပါသည်။ 

၂၀၂၂ ခုနှစ် ဖေဖော်ဝါရီလအတွင်း ကြုံတွေ့ခဲ့ရသည့် ဒီဂျစ်တယ်ဖိနှိပ်မှု ဖြစ်စဉ် အနှစ်ချုပ် 

• VPN အသုံးပြုမှုများအား ဥပဒေမဲ့ ဖိနှိပ်မှုများ ပြုလုပ်ခြင်း 

• ဆက်လက်ဖိနှိပ်ခံနေရစဲ လွတ်လပ်စွာထုတ်ဖော်ပြောဆိုခွင့်

• အချိန်ပိုင်းအင်တာနက် ဖြတ်တောက်မှု ဖြစ်စဉ်

• ချင်းပြည်နယ်တွင် Mytel Sim Card ဖြင့် တစ်နေ့ (၂) နာရီ အင်တာနက်အသုံးပြုခွင့်ပေး

VPN အသုံးပြုမှုများအား ဥပဒေမဲ့ ဖိနှိပ်မှုများ ပြုလုပ်ခြင်း 

၂၀၂၂ ခုနှစ် ဇန်နဝါရီလ (၂၁) ရက်နေ့တွင် Cyber Law မူကြမ်းတစ်ခု စတင်ပျံ့နှံ့ပြီးနောက် ယင်း Cyber Law မူကြမ်းတွင် ထည့်သွင်းဖော်ပြထားသည့် VPN အသုံပြုမှုကို ပိတ်ပင်သည့် ပုဒ်မ တစ်ခုအား အကြောင်းပြုကာ စစ်ကောင်စီ အနေဖြင့် ခရီးသွားပြည်သူများ၏ ဖုန်းများအား VPN အသုံးပြုမှု ရှိမရှိ စစ်ဆေးမှုများပြုလုပ်သည့် ဖြစ်စဉ်များကို သတင်းဖော်ပြချက်များတွင် တွေ့ရှိရသည်။ စစ်ကောင်စီအဖွဲ့ဝင်များ အနေဖြင့် ထိုသိုဖိနှိပ်မှုများ ပြုလုပ်သည့် ကာလတွင် Cyber Law သည် တရားဝင်အတည်ပြု ပြဋ္ဌာန်းပြီးသော အခြေအနေမဟုတ်ပဲ မူကြမ်းအဆင့်တွင်သာ ရှိနေသည်။ 

VPN အသုံးပြုမှုဆိုင်ရာ စစ်ဆေးခံရမှုများနှင့် ပါတ်သက်သည့် မဲခေါင် သတင်းဋ္ဌာနပါ ဖော်ပြချက်

ဆက်လက်ဖိနှိပ်ခံနေရစဲ လွတ်လပ်စွာထုတ်ဖော်ပြောဆိုခွင့်

စစ်ကောင်စီသည် အာဏာသိမ်းကာလမှ စတင်ပြီး လည်းကောင်းတို့နှင့် ဆန့်ကျင့်သည့် လူထု၏ ထုတ်ဖော်ပြောဆိုမှုများ ၊ သဘောထားဆိုင်ရာကိစ္စရပ်များအား ထိန်းချုပ်နိုင်ရန် စဉ်ဆက်မပျက်ကြိုးပမ်းခဲ့သည်ကို တွေ့ရပြီး ထိုသို့ ကြိုးပမ်းမှုများလုပ်ဆောင်ရာတွင် အထူးသဖြင့် Social Media ပေါ်မှတဆင့် ထုတ်ဖော်ပြောဆိုမှုများနှင့် ပါတ်သက်ပြီး ပြင်းထန်စွာ ကန့်သတ်နိုင်ရန် ကြိုးပမ်းခဲ့သည်။ 

ထိုသို့ လူထု၏ လွတ်လပ်စွာ ထုတ်ဖော်ပြောဆိုမှုများကို ကန့်သတ်သော ဖြစ်စဉ်အဖြစ် သက်သေသာဓက ခိုင်မာစွာ ပြဆိုနိုင်သည့် ဖြစ်ရပ်တစ်ခုအနေဖြစ် ဖော်ဖော်ဝါရီ လအစပိုင်းတွင် စစ်ကောင်စီအနေဖြစ် Facebook Account နှင့် Page များတွင် ၎င်းတို့ မနှစ်သက်သည့် အကြောင်းအရာများ ရေးသားခဲ့သည့် စဉ့်ကိုင်မြို့နယ်စျေးနှင့် မြင်းခြံမြို့ စံပြစျေးတွင် စျေးရောင်းချသူ ၁၂ ဦးအပါအဝင် Social Media တွင် ရေးသားသူများအား နိုင်ငံတော်တည်ငြိမ်အေးချမ်းရေး ပျက်ပြားစေရန် လှုံ့ဆော်မှုဟုခေါင်းစဉ်တပ် ဖမ်းစီးမှုများ ပြုလုပ်ခဲ့သည်ဟု စစ်ကောင်စီ၏ သတင်းထုတ်ပြန်ရေးအဖွဲ့မှ ထုတ်ပြန်ခဲ့သည်။ ယင်းထုတ်ပြန်ချက်အရ အမှုဖွင့်အရေးယူမှုများ ပြုလုပ်ရာတွင် နေပြည်တော်၊ မန္တလေးတိုင်း၊ ပဲခူးတိုင်း ၊ ရန်ကုန်တိုင်းဒေသကြီး၊ ရှမ်းပြည်နယ်၊ ကရင်ပြည်နယ် တို့မှ Social Media အသုံးပြုနေသည့် အကောင့်များအပါခဲ့သည်ကိုတွေ့ရသည်။ 

အထက်ပါဖြစ်ရပ်သည် စစ်ကောင်စီအနေဖြင့် ၎င်းတို့နှင့် ဆန့်ကျင့်သည့် ပြောဆိုမှုများအပေါ် ပြင်ထန်းစွာ ဖိနှိပ်မှုများပြုလုပ်နေသည့် သက်သေသာဓက တစ်ခုဟုလည်းဆိုနိုင်သည်။ 

နောက်ထပ် ထင်ရှားသည့် ဖြစ်ရပ်တစ်ခုအနေဖြင့် စစ်ကောင်စီသည် ၂၀၂၁ ခုနှစ် ဖေဖော်ဝါရီလ (၁) ရက်နေ့ အာဏာသိမ်းမှု လုပ်ဆောင်ပြီးနောက် နှစ်ပါတ်ခန့်အကြာမှ စတင်ပြီး ယနေ့ကာလအထိ တယ်လီနောမြန်မာရုံးချုပ်သို့ မိုဘိုင်းဖုန်းအသုံးပြုသူများနှင့် သက်ဆိုင်သည့် အချက်အလက်များကို အနည်းဆုံးအကြိမ် (၂၀၀) ခန့်အထိ တောင်းခံမှုများ ပြုလုပ်ခဲ့သည်ဟု Myanmar Now သတင်းဋ္ဌာနမှ ဖေဖော်ဝါရီ (၇) ရက်နေ့တွင် ရေးသား ဖော်ပြခဲ့သည်ကို တွေ့ရသည်။ အချို့သော တောင်းခံမှု အကြိမ်များတွင် ဖုန်းနံပါတ်များ ရာနှင့်ချီကာပါဝင်ခဲ့သည့်အတွက် ထောင်နှင့်ချီသည့် မြန်မာနိုင်ငံ မိုဘိုင်းဖုန်းအသုံးပြုသူများ၏ အချက်အလက်များအား စစ်ကောင်စီသို့ပေးခဲ့ရသည်ဟုဆိုသည်။ သတင်းဖော်ပြချက်အရ တောင်းခံသည့် အချက်အလက်များတွင် ဖုန်းခေါ်ဆိုမှု မှတ်တမ်းများ ၊ တည်နေရာများ ပါဝင်သည်ကိုတွေ့ရသည်။ ထိုသို့ တောင်းခံမှု ပြုလုပ်ခြင်းသည် တယ်လီနော တစ်ခုတည်းသာ မကပဲ လက်ရှိလုပ်ကိုင်နေသော အခြား Operator အားလုံးထံမှပါ တောင်းခံခဲ့ခြင်းဖြစ်သည်။ 

ယင်းဖြစ်ရပ်သည် စစ်အာဏာသိမ်းမှုနောက်ပိုင်းတွင် မြန်မာနိုင်ငံသားတို့၏ လွတ်လပ်စွာထုတ်ဖော်ပြောဆိုခွင့် သာမက ပြည်သူတစ်ဦးခြင်းစီ၏ ပုဂ္ဂလိကဆိုင်ရာ လုံခြုံရေးနှင့် ပါတ်သတ်ပြီး အလုံးစုံ အာမခံချက်မရှိသည့် အခြေအနေများကို မီးမောင်းထိုးပြနေသည့် ဖြစ်စဉ်များဖြစ်သည်။ 

အချိန်ပိုင်းအင်တာနက် ဖြတ်တောက်မှု ဖြစ်စဉ်

စစ်ကောင်စီသည် ၂၀၂၂ ခုနှစ် ဖေဖော်ဝါရီလ (၁၂) ရက်နေ့ (၇၅) ကြိမ်မြောက် ပြည်ထောင်စုနေ့တွင်လည်း နံနက်အစောပိုင်းမှ စတင်ပြီး ညနေစောင်းချိန်အထိ အင်တာနက်လိုင်းများ ဖြတ်တောက်မှုတစ်ခု ပြုလုပ်ခဲ့သည်ကို တွေ့ရသည်။ ထိုသို့ အင်တာနက်ဖြတ်တောက်မှု ပြုလုပ်သည့်ဖြစ်စဉ်အား ရန်ကုန်၊ မန္တလေး၊ ပဲခူးတိုင်း၊ ကရင်ပြည်နယ်၊ ရခိုင်ပြည်နယ်တို့အပါအဝင် မြန်မာနိုင်ငံအနှံအပြားရှိ မြို့ကြီးများတွင် ပြုလုပ်ခဲ့ခြင်းဖြစ်သည်။ 

ဖေဖော်ဝါရီ (၁၂) ရက်နေ့ လူထုလှုပ်ရှားမှု ကမ်ပိန်းအတွက် အွန်လိုင်းပေါ်တွင် တွေ့ရသည့် လှုံ့ဆော်စာများ

တော်လှန်ရေး သပိတ်အင်အားစုများအနေဖြင့် စစ်အာဏာရှင် စနစ်ဆန့်ကျင်ရေး လူထုလှုပ်ရှားမှုအနေဖြင့် “ အလံနှင့်အသံကိုနားစွင့်ကြွ။ လမ်းမများပေါ်တွင် လက်သုံးချောင်း ပြိုင်တူထောင်၍ ကြွေးကြော်ကြ။ မိမိရောက်ရှိရာနေရာ၌ ကား/ဆိုင်ကယ် ဟွန်းများ တီးကြ။” စသည့် စာတမ်းများဖြင့် အွန်းလိုင်းပေါ်မှ တဆင့် လူထုကို လှုံ့ဆော်မှုများ ပြုလုပ်ခဲ့ပြီး ယင်းလုပ်ဆောင်မှုများကို ဖေဖော်ဝါရီလ (၁၂) ရက်နေ့ ညနေ (၅) နာရီ အချိန်တွင် စုပေါင်း လှုံ့ဆော်ရန် တိုက်တွန်းခဲ့ကြသည်။ 

စစ်ကောင်စီအနေဖြင့် ယင်းလူထုလှုပ်ရှားမှုအား မပေါ်ပေါက်စေရန်၊ သတင်းဆက်သွယ်မှု ပျက်တောက်သွားစေရန် စသည့်ရည်ရွယ်ချက်များဖြင့် ယင်းအင်တာနက်ဖြတ်တောက်မှုကို ပြုလုပ်ခဲ့ခြင်းဖြစ်သည်။ စစ်ကောင်စီသည် အာဏာသိမ်းမှု စတင်ချိန်မှ စပြီး အင်တာနက်ဖြတ်တောက်မှုကြောင့် ဖြစ်ပေါ်လာမည့် ဆိုးကျိုးများကို (လုံးဝ) ထည့်သွင်းတွက်ချက်ခြင်းမရှိပဲ ၎င်းတို့အာဏာတည်မြဲရေးတစ်ခုတည်းကိုသာ ရှေးရှုပြီး ပုံစံမျိုးစုံဖြင့် အင်တာနက်ဖြတ်တောက်မှုများကို ပြုလုပ်လာခဲ့သည်ကိုလည်း တွေ့ရှိရသည်။ 

ထိုကဲ့သို့ စစ်ကောင်စီအနေဖြင့် ဖိနှိပ်မှုများပြုလုပ်နေသလို့ ၎င်းတို့ စစ်ကြောင်းထိုးရာဒေသများရှိ လူထု၏ ဒီဂျစ်တယ်အသုံးပြုမှုနှင့်ပါတ်သက်သည့် ဖိနှိပ်မှုများကိုလည်း မကြာခန ပြုလုပ်လေ့ရှိသည်ကိုတွေ့ရသည်။ သံလွင်ခတ် သတင်းဋ္ဌာန၏ ဖေဖော်ဝါရီလ (၂၂) ရက်နေ့ သတင်းဖော်ပြချက်အရ ကရင်ပြည်နယ်၊ ကော့ကရိတ်မြို့နယ်၊ အံဖလေးရွာ ဒေသခံများ၏ လက်ကိုင်ဖုန်းများကို စစ်ကောင်စီ တပ်ဖွဲ့ဝင်များကို သိမ်းဆည်းခဲ့သည့် ဖြစ်စဉ်တစ်ခုကိုလည်း ဖေဖော်ဝါရီလအတွင်းတွေ့ရှိခဲ့ရသည်။ 

ချင်းပြည်နယ်တွင် Mytel Sim Card ဖြင့် တစ်နေ့ (၂) နာရီ အင်တာနက်အသုံးပြုခွင့်ပေး

ချင်းပြည်နယ်တွင် လက်ရှိ စစ်တပ်ပိုင် Telecom Operator ဖြစ်သည့် Mytel မှ ဝန်ဆောင်မှုပေးသော Sim Card ဖြင့် တစ်နေ့လျှင် (၂) နာရီခန့် အင်တာနက်အသုံးပြုနိုင်နေသည်ကို တွေ့ရသည်ဟု DVB သတင်းဋ္ဌာနတွင် ဖေဖော်ဝါရီလ (၂၆) ရက်နေ့က ဖော်ပြခဲ့သည်ကိုတွေ့ရသည်။ 

ယင်းလုပ်ဆောင်ချက်သည့်  တယ်လီကွန်းစျေးကွက်အတွင်း ပြိုင်ဆိုင်မှုဆိုင်ရာ မညီမျှကိုကို ထင်ဟပ်စေသည့်အပြင် Mytel သည် စစ်တပ်၏ အလုံးစုံထိန်းချုပ်မှုအောက်တွင် လည်ပတ်နေသော Operator တစ်ခုဖြစ်နေသည့်အတွက် သုံးစွဲသူများ၏ အချက်အလက် လုံခြုံရေးဆိုင်ရာ အခြေအနေများနှင့် ပါတ်သက်ပြီး အငြင်းပွားဖွယ်ရာပေါင်းများစွာရှိနေသည့် Operator လည်းဖြစ်သည်။ 

၂၀၂၂ ခုနှစ် မတ်လအတွင်း ကြုံတွေ့ခဲ့ရသည့် ဒီဂျစ်တယ်ဖိနှိပ်မှု ဖြစ်စဉ် အနှစ်ချုပ် 

• အွန်လိုင်းမှတဆင့် ငွေကြေးလွှဲပြောင်းမှုများအား စောင့်ကြည့်ခြေရာခံမှုဖြစ်စဉ် 

• စစ်ကိုင်းတိုင်း အင်တာနက်ဖြတ်တောက်မှု 

• တယ်လီနောနှင့် ကြားဖြတ်ဖမ်းယူရေးဆက်များတပ်ဆင်မှုဆိုင်ရာ စွတ်စွဲချက်များ 

• တယ်လီနောရောင်းချမှုအားအတည်ပြု 

စစ်အာဏာရှင် ဆန့်ကျင်ရေးလှုပ်ရှားမှုများအတွက် ထောက်ပံ့ပေးနေသည့် အဖွဲ့များ၏ အွန်လိုင်းမှ တဆင့် ငွေကြေးကောက်ခံမှုများအား မတ်လအစပိုင်းတွင် စောင့်ကြည့်ခြေရာခံ ဖမ်းဆီးဖော်ထုတ်မှုများကို သိသိသာသာ တိုးမြှင့်လုပ်ဆောင်ခဲ့သည်ကိုတွေ့ရသည်။ ထိုသို့လုပ်ဆောင်မှုများတွင် Wave Money မှ တဆင့် ငွေကြေးလွှဲပြောင်းမှုများကိုပါ ခြေရာခံ၍ ဖမ်းဆီးထိန်းသိမ်းမှုများရှိခဲ့သည်။ စစ်ကောင်စီ၏ အွန်လိုင်းမှ ငွေကြေးလွှဲပြောင်းမှုများကို စောင့်ကြည့် ဖမ်းဆီးမှုများကြောင့် အွန်လိုင်းမှတဆင့် စစ်အာဏာရှင် ဆန့်ကျင်ရေးအတွက် ရန်ပုံငွေရှာဖွေပေးနေသည့် အဖွဲ့များအနေဖြင့် ၎င်းတို့၏ လှုပ်ရှားမှုများကို ခေတ္တရပ်ဆိုင်းကြောင်း မတ်လ (၂) ရက်နေ့တွင် ကြေငြာခဲ့ကြရသည်။ 

တော်လှန်ရေး ရန်ပုံငွေ ထောက်ပံ့ရေးအဖွဲ့တစ်ခုမှ ထုတ်ပြန်သည့် ကြေငြာချက်

တော်လှန်ရေး အလှူငွေကောက်ခံမှုဆိုင်ရာကိစ္စရပ်များကို ခေတ္တရပ်နားကြောင့် ကြေငြာခဲ့သည့်အဖွဲ့များတွင် ANTS – ပုရွက်ဆိတ်များ၊ To Comrades – ရဲဘော်များသို့၊ Yell Baw – ရဲဘော်၊ လှူကြမယ်+ဒီကကြည့်၊ Dogs Fighter၊ မြတ်နိုးရင်လှူ၊ နိုင်ချင်ရင်လှူ စသည့် အဖွဲ့များပါဝင်ပြီး အချို့သော အဖွဲ့များအနေဖြင့် လည်းကောင်းတို့ သုံးစွဲသော Facebook စာမျက်နှာများကို ဖြုတ်ချခဲ့ရသည့် အခြေအနေများ ဖြစ်ပေါ်ခဲ့သည်။ 

စစ်ကိုင်းတိုင်း အင်တာနက်ဖြတ်တောက်မှု 

စစ်ကောင်စီသည် မတ်လ (၃) ရက်နေ့ ညပိုင်းမှ စတင်ပြီး မုံရွာ၊ စစ်ကိုင်း၊ ကလေး၊ ရွှေဘို စသည့် (၄) မြို့နယ်အား ချန်လှပ်ပြီး စစ်ကိုင်းတိုင်းဒေသကြီးတစ်ခုလုံးနီပါးအား အင်တာနက်ဖြတ်တောက်မှုကို ထပ်မံပြုလုပ်ခဲ့သည်ကို တွေ့ရသည်။ 

စစ်ကိုင်းတိုင်းဒေသကြီးသည် စစ်အာဏာရှင် တော်လှန်ရေးအင်အား စုများနှင့် စစ်ကောင်စီတို့ ပဋိပက္ခ ပြင်းထန်သည့်ဒေသဖြစ်သည်။ အာဏာသိမ်း စစ်ကောင်စီသည် အင်တာက်နက် ဖြတ်တောက်မှုများပြုလုပ်ပြီးနောက် ယင်းဒေသအတွင်ပိုမိုပြင်းထန်သည့် ထိုးစစ်ဆင်မှုများ ပြုလုပ်လာခြင်း ၊ ဒေသခံများ၏ အသက် အိုးအိမ် များအား ဖျက်စီးမှုများ ပိုမိုပြုလုပ်လာခြင်းတို့ကို သတင်းဖော်ပြချက်များအရ သိရှိရသည်။ 

တယ်လီနောနှင့် ကြားဖြတ်ဖမ်းယူရေးဆက်များတပ်ဆင်မှုဆိုင်ရာ စွတ်စွဲချက်များ 

တယ်လီနောအနေဖြင့် ဖုန်းခေါ်ဆိုမှုများနှင့်မက်ဆေ့ချ်များကို တပြိုင်နက်စောင့်ကြည့် ကြားဖြတ်နားထောင်နိုင်သော  တရားဝင်ကြားဖြတ်နားထောင်ရေးဆိုင်ရာဂိတ်ဝေး Lawful Interception Gateway (LIG) ကို ဂျာမနီကုမ္ပဏီတစ်ခုဖြစ်သည့် Utimaco ထံမှ ဝယ်ယူခဲ့ပြီး ထိုဝယ်ယူမှုတွင် တရုတ်ကုမ္မဏီတစ်ခုဖြစ်သည့် Huawei မှ ကြားခံဆောင်ရွက်ပေးကား မြန်မာနိုင်ငံသို့ တင်ပို့ခဲ့သည်ဟု Justice For Myanmar အဖွဲ့မှ ထုတ်ပြန်ကြေငြာခဲ့သည်ကိုတွေ့ရသည်။ Utimaco ၏ အဝေးထိန်းပံ့ပိုးမှုများဖြင့် ၂၀၂၀ ခုနှစ် နှစ်လယ်ပိုင်းတွင် ယင်း LIG သည် စောင့်ကြည့်ရေးဆိုင်ရာ စင်တာတစ်ခုနှင့်ပါ ချိတ်ဆက်ပြီး ဖြစ်သည်ဟု ယင်းအဖွဲ့ကပင် ထပ်မံဖော်ထုတ်ပြောကြားခဲ့သည်ကိုတွေ့ရသည်။ 

ယင်းစွတ်စွဲချက်နှင့်ပါတ်သက်ပြီး တယ်လီနောအုပ်စု၏ ဆက်ဆံရေးဋ္ဌာန အကြီးအကဲ ဖြစ်သည့် Gry Rohde Nordhus က မြန်မာနိုင်ငံတွင် လုပ်ကိုင်နေသော Telecom Operator အားလုံးတွင် တပ်ဆင်ရန်လိုအပ်သည့် ကြားဖြတ်နားထောင်ရေးဆိုင်ရာနည်းပညာမျာကို မတပ်ဆင်လို၍ ရောင်းချရခြင်းဖြစ်ကြောင်း DVB သတင်းဋ္ဌာနသို့ ထုတ်ဖော်ပြောပြပြီး ပြန်လည်ချေပခဲ့သည်ကို မတ်လ (၁၆) ရက်နေ့ DVB သတင်းဋ္ဌာန၏ စာမျက်နှာတွင် ဖော်ပြခဲ့သည်ကို တွေ့ရှိရသည်။ 

အထက်ပါအချက်ကိုသုံးသပ်ကြည့်ပါက မြန်မာနိုင်ငံတွင် လက်ရှိလုပ်ကိုင်နေသော Telecom Operator အားလုံးသည် စစ်ကောင်စီ၏ ဖိအားပေးမှုဖြင့် ကြားဖြတ်နာထောင်ရေးဆိုင်ရာ စက်ပစ္စည်းများ တပ်ဆင်ပေးရေးကို မလူးသာမလွန့်လာ လက်ခံလိုက်ပြီ ဖြစ်ကြောင်းထင်ရှားစေပါသည်။ 

တယ်လီနောရေင်းချမှုအားအတည်ပြု 

စစ်ကောင်စီ၏ လက်အောက်ခံ မြန်မာ့ရင်းနှီးမြုတ်နှံမှု ကော်မရှင်အနေဖြင့် တယ်လီနောမြန်မာအား M1 Group သို့ရောင်းချမှုကို အတည်ပြုပေးခဲ့ကြောင်းကို မတ်လ (၁၈) ရက်နေ့တွင် တယ်လီနောအနေဖြင့် တရားဝင် ထုတ်ဖော်ပြောကြားခဲ့ပါသည်။ 

တယ်လီနောအနေဖြင့် ၎င်းရောင်းဝယ်မှုတွင် M1 Group သို့သာ ရောင်းချခဲ့ခြင်းဖြစ်ပြီး စစ်တပ်၏ အကျိုးစီးပွားနှင့် သက်ဆိုင်ခြင်းမရှိသူကိုသာရောင်းချခဲ့ခြင်းဖြစ်သည်ဟု ပြောဆိုခဲ့သော်လည်း ယင်းလုပ်ငန်းကို ဆက်လက်လုပ်ကိုင်မည့် M1 Group ၏ Investcom PTD Ltd သည် စစ်ကောင်စီနှင့်အလွန်နီးစပ်မှုရှိသည့် ရွှေဗျိုင်းဖြူ ကုမ္ပဏီနှင့် ဖက်စပ်လုပ်ဆောင်သွာမည်ဖြစ်ပြီး ရွှေဗျိုင်းဖြူက အစုရှယ်ယာ ၈၀ ရာခိုင်နှုန်းအထိ ပိုင်ဆိုင်မှု ရမည်ဟု ခိုင်မာသော သတင်းအရင်းမြစ်များက ဆိုထားပါသည်။ 

ယင်း Investcom PTE Ltd တွင် အာဏာသိမ်း စစ်ခေါင်းဆောင် မင်းအောင်လှိုင်၏ သမီးဖြစ်သူ ခင်သီရိသက်မွန်အနေဖြင့် အစုရှယ်ယာများပိုင်ဆိုင်ကြောင်း Ayarwaddy သတင်းဋ္ဌာန အနေဖြင့် မတ်လ (၂၄) ရက်နေ့တွင် ထုတ်ဖော်ရေးသားခဲ့သည်ကို တွေ့ရှိရသည်။  

အထက်ပါ အချက်အလက်များအရ တယ်လီနောသည် မြန်မာနိုင်ငံမှာ ပြန်လည်ထွက်ခွာရေးအတွင် ဆုံးဖြတ်ချက် ချမှတ်ဆောင်ရွက်လုပ်ဆောင်ရာတွင် အသုံးပြုသူများ၏ ထိခိုက်နစ်နာနိုင်သော အကျိုးဆက်များကို လစ်လျှူရှုပြီး ပစ်စလက်ခတ် လုပ်ဆောင်ခဲ့သည်ကို ထင်ရှားစွာတွေ့မြင်နိုင်ပါသည်။ 

၂၀၂၂ ခုနှစ် ဧပြီလအတွင်း ကြုံတွေ့ခဲ့ရသည့် ဒီဂျစ်တယ်ဖိနှိပ်မှု ဖြစ်စဉ် အနှစ်ချုပ် 

• ထားဝယ်ခရိုင်အတွင်း အင်တာနက်ပျက်တောက်မှု ဖြစ်စဉ် 

• အင်တာနက်စာမျက်နှာများအာ ဖြုတ်ချမှုများ ပြုလုပ်ပေးရန် Telecom Operator များ နှင့်  ISP  လုပ်ငန်းများသို့ စစ်ကောင်စီ ဖိအားပေး 

• ခန္တီးနှင့် ဟုမ္မလင်း အင်တာနက်ပြန်ဖွင့်

• ဖားကန့်မြို့အနီးတဝိုက်တွင် Mytel Sim Card ဖြင့် လဝက်ခန့် အင်တာနက်အသုံးပြုနိုင်ခဲ့

• တယ်လီနော Sim Card များ မှတ်ပုံတင်မှု ပြန်လည်ပြုလုပ်ခိုင်းမှု ဖြစ်စဉ်

ထားဝယ်ခရိုင်အတွင်း အင်တာနက်ပျက်တောက်မှု ဖြစ်စဉ် 

တနင်္သာရီတိုင်း၊ ထားဝယ်ခရိုင် သရက်ချောင်းမြို့နယ်ရှိ တောင်ပျောက်တိုက်နယ်အတွင်းလည်း အင်တာနက်လိုင်းများ ပြတ်တောက်ခဲ့သည်။ ယင်းအင်တာနက် ပျက်တောက်မှုသည် မတ်လ (၃၁) ရက်နေ့ ညနေပိုင်းတွင် စတင်ဖြစ်ပေါ်ခဲ့ပြီး ဧပြီလ (၁) ရက်နေ့ မနက် (၉) နာရီခွဲတွင် ပြန်လည် ရရှိကာ မွန်းလွဲ (၁) ရီ ဝန်းကျင်တွင် ပြန်လည် ဖြတ်တောက်လိုက်သည်ဟု မဇ္ဇိမ သတင်းဋ္ဌာနတွင် ဖော်ပြခဲ့သည်ကိုတွေ့ရသည်။ ယင်းတောင်ပျောက်တိုက်နယ်တွင် မတ်လ (၃၁) ရက်နေ့က စစ်ကောင်စီ တပ်ဖွဲ့များ စစ်ကြောင်းထိုး ဝင်ရောက်လာပြီးနောက် စစ်ရေးတင်းမာနေသည့် နေရာလည်းဖြစ်သည်။ 

အင်တာနက်စာမျက်နှာများအာ ဖြုတ်ချမှုများ ပြုလုပ်ပေးရန် Telecom Operator များ နှင့်  ISP  လုပ်ငန်းများသို့ စစ်ကောင်စီ ဖိအားပေး 

NUG၊ CRPH၊ မီဒီယာများနှင့် စစ်တပ်ဆန့်ကျင်သူ ပုဂ္ဂိုလ်အဖွဲ့အစည်းများ သုံးစွဲနေသည့် အင်တာနက် စာမျက်နှာများများအား ချိတ်ဆက်အသုံးပြုခြင်း မပြုလိုက်နိုင်ရေး ဆောင်ရွက်ရွက်ရန် မြန်မာနိုင်ငံတွင် လက်ရှိလုပ်ကိုင်နေသော Telecom Operator များနှင့် ISP လုပ်ငန်းများ စစ်တပ်က လျှို့ဝှက်ညွှန်ကြားခဲ့သည့် ညွှန်ကြားစားတစ်စောင်ပေါက်ကြားလာခဲ့ကြောင်းကို ခေတ်သစ် သတင်းမီဒီတွင် ဖော်ပြထားသည်ကို တွေ့ရှိရသည်။ 

ဧပြီလ (၈) ရက်နေ့ နေစွဲဖြင့် ထုတ်ပြန်ခဲ့သော ယင်းလျှို့ဝှက်ညွှန်ကြားစာတွင် အထက်ပါညွှန်ကြားချက်ကို မလုပ်ဆောင်ပါက အရေးယူမည်ဟု ချိန်းခြောက်ထားသည့်အပြင် စီမံဆောင်ရွက်နေမှု အခြေအနေများကိုလည်း ပြန်လည် တင်ပြရန် ထည့်သွင်း ညွှန်ကြားထားသည်ကိုတွေ့ရသည်။ 

စစ်ကောင်စီသည် အာဏာသိမ်းပြီးချိန်မှစ၍ လည်းကောင်းတို့နှင့်ဆန့်ကျင်သော အကြောင်းအရာများကို အွန်လိုင်းမှတဆင့် မပျံ့နှံ့နိုင်ရေး၊ လူထုလှုပ်ရှားမှုများအား အွန်လိုင်းပေါ်မှ စည်းရုံးလှုံ့ဆော်မှုများ မပြုလုပ်နိုင်ရေးအတွက် နည်းလမ်းပေါင်းစုံ အသုံးပြုပြီး ဟန့်တားမှုများ ပြုလုပ်လေ့ရှိသည်။ ထို့သို့ ပြုလုပ်နေသော်လည်း ၎င်းတို့၏ ညွှန်ကြားချက်များကိုပင် ပေါက်ကြားခြင်းမရှိအောင် ထိမ်းသိမ်းနိုင်စွမ်းမရှိပဲ လျှို့ဝှက် အမိန့်များ ၊ ညွှန်ကြားချက်များသည် အွန်လိုင်းမှတဆင့် မကြာခဏ ပျံ့နှံလာလေ့ရှိသည်ကိုတွေ့ရသည်။

ခေတ်သစ်မီဒီယာတွင် ဖော်ပြခဲ့သော ပေါက်ကြားလာခဲ့သည့် လျှို့ဝှက်ညွှန်ကြားချက်

ခန္တီးနှင့် ဟုမ္မလင်း အင်တာနက်ပြန်ဖွင့်

မတ်လ ပထမ ပတ်ထဲမှစတင်ပြီး စစ်ကောင်စီသည် စစ်ကိုင်းတိုင်းတစ်ခုလုံးနီးပါကို အင်တာနက်ဖြတ်တောက်ခဲ့ပြီး ယင်းဖြတ်တောက်ခံရမှုတွင် ပါဝင်ခဲ့သည့် မြို့နယ်များထဲမှ မြို့နယ်နှစ်ခုဖြစ်သည့် ခန္တီးနှင့် ဟုမ္မလင်း မြို့နယ်တို့အား ဧပြီလ (၁၇) ရက်နေ့တွင် အင်တာနက်ပြန်ဖွင့်ပေးခဲ့သည်။ 

စစ်ကိုင်းတိုင်းအတွင်း စစ်ကိုင်း၊ မုံရွာ၊ ရွှေဘို၊ ကလေး၊ ခန္တီးနှင့် ဟုမ္မလင်းမြို့နယ်များမှလွဲ၍ အခြားသော (၃၁) မြို့နယ်မှာ ယခုအချိန်အထိ အင်တာနက်ဖြတ်တောက်ခံထားရစဲအခြေအနေတွင်သာ ရှိနေသည်။

ဖားကန့်မြို့အနီးတဝိုက်တွင် Mytel Sim Card ဖြင့် လဝက်ခန့် အင်တာနက်အသုံးပြုနိုင်ခဲ့

အင်တာနက်အသုံးပြုခွင့် ဖြတ်တောက်ခံထားရသည်မှာ (၈)လ ဝန်းကျင်ခန့် ကြာမြင့်ခဲ့ပြီ ဖြစ်သော ဖားကန့်တွင် ဧပြီလ (၄) ရက်နေ့မှ စတင်ကာ Mytel Sim Card ဖြင့် အင်တာနက် ပြန်လည်သုံးစွဲနိုင်ခဲ့သည်ကို တွေ့ရပြီး ဧပြီလ (၁၈) ရက်နေ့တွင် ပြန်လည်ပြတ်တောက်သွားခဲ့သည်။ 

ဖေဖော်ဝါရီလ ချင်းပြည်နယ်ဖြစ်စဉ်နဲ့ ယခု ဖားကန့် ဖြစ်စဉ်တို့တွင် Mytel Sim Card ဖြင့်သာ အင်တာနက် အသုံးပြုခွင့်ကို ပြန်လည်ရရှိခဲ့သည်များကိုတွေ့ရပြီး ယင်းအခြေအနေသည် Telecom လုပ်ငန်းများ၏ ပြိုင်ဆိုင်မှု ချိန်ခွင်ရှာ တိမ်းစောင်မှုကို ဖြစ်စေသည်မှာ မြင်သာသည့် အခြေအနေတစ်ခုဖြစ်သည်။ 

ထို့အပြင် အခြားသော လုံခြုံရေးနှင့် သတင်းရယူနိုင်ရေးဆိုင်ရာ ရည်ရွယ်ချက်များဖြင့် Mytel Sim Card အား အသုံးပြု အင်တာနက်အသုံးပြုခွင့် ပေးခြင်းများလည်း ဖြစ်နိုင်ခြေရှိနိုင်ရာ သုံးစွဲသူများအနေဖြင့် ဂရုစိုက်ရမည့် အခြေအနေရှိနေသည်။ 

တယ်လီနော Sim Card များ မှတ်ပုံတင်မှု ပြန်လည်ပြုလုပ်ခိုင်းမှု ဖြစ်စဉ်

စစ်တပ်နှင့် အလွန်နီးစပ်မှုရှိသည် ရွှေဗျိုင်းဖြူကုမ္မဏီနှင့် M1 Group တို့အနေဖြင့် Telenor Myanmar အား လက်လွှဲဝယ်ယူခွင့်ရရှိပြီးနောက် Sim Card များအား ပြန်လည်မှတ်ပုံတင်ခိုင်းသည့် အခြေအနေများ ဖြစ်ပေါ်နေသည် ကိုတွေ့ရသည်။ 

ထို့အပြင် ပြန်လည်မှတ်ပုံတင်ခြင်းမပြုလုပ်သည့် Sim Card များအား အထွက်ခေါ်ဆိုမှုများ ပိတ်ပင်ထားသည့် ဖြစ်စဉ်များလည်း ဖြစ်ပေါ်လျှက်ရှိသည်။

နော်ဝေးပိုင် တယ်လီနောအနေဖြင့် စစ်ကောင်စီ၏ ကြားဖြတ်ဖမ်းယူရေးဆိုင်ရာ စက်ပစ္စည်းများ ဖိအားပေးတပ်ဆင်ခိုင်းမှုကို လိုက်နာနိုင်ခြင်းမရှိသဖြင့် ထွက်ခွာရခြင်းဖြစ်သည်ဟု ထုတ်ပြန်ချက်များ ရှိခဲ့သည်ဖြစ်ရာ စစ်တပ်နှင့် နီးစပ်မှုရှိသည့် လက်လွှဲဝယ်ယူသူများအနေဖြင့် စစ်ကောင်စီ၏ အထက်ပါ တောင်းဆိုမှုကို သေချာပေါက်လုပ်ဆောင်ပေးမည်ဖြစ်သည်။ လက်ရှိအခြေအနေများအရ မိုဘိုင်းဖုန်းသုံးစွဲသူများအနေဖြင့် Telenor အပါအဝင် Operator အားလုံး၏ ဝန်ဆောင်မှုများအား အသုံးပြုပြီး ဖုန်းခေါ်ဆိုမှုနှင့် SMS ပေးပို့မှုများ အသုံးပြုပြီး အရေးကြီးသည့် ကိစ္စရပ်များအား ပြောဆိုဆွေးနွေးခြင်း၊ စာတိုပေးပို့ခြင်းများ ပြုလုပ်မည့်အစား (Signal, Telegram) ကဲ့သို့ လုံခြုံရေးဆိုင်ရာ အားကောင်းမှုရှိသည့် အင်တာနက်ပလက်ဖောင်းများအား သုံးစွဲ ဆက်သွယ်သည့် အလေ့အကျင့် များကို အသုံးပြုဆက်သွယ်ခြင်းက ပိုမို သင့်တော်ဖွယ်ရှိသည်။ 

အာဏာသိမ်းကာလ ဒုတိယမြောက်နှစ်၏ ပထမသုံးလတာကာလအတွင်းတွင် ပုံစံမျိုးစုံဖြင့် အင်တာနက်သုံးစွဲမှုဆိုင်ရာ ကန့်သတ်မှုများ၊ လွတ်လပ်စွာ ထုတ်ဖော်ပြောဆိုခွင့်ကို ထိပါးစေသော လုပ်ဆောင်ချက်များ၊ အွန်လိုင်းသုံးစွဲသူများအား စောင့်ကြည့်ခြေရာခံနိုင်ရန်အားထုတ်မှုများ၊ အင်တာနက် ဝက်ဆိုက် များအား ထိန်းချုပ်နိုင်ရန် လုပ်ဆောင်ချက်များ စသည့် ဒီဂျစ်တယ်ရပ်ဝန်းဆိုင်ရာ ဖိနှိပ်မှု ဆိုင်ရာ အခြေအနေများကို တွေ့မြင်ခဲ့ရပါသည်။ 

 DIGITAL COUP QUARTERLY ( May 2022 to July 2022)

 DIGITAL COUP QUARTERLY ( February 2022 to April 2022)

 DIGITAL COUP QUARTERLY ( November 2021 to January 2022)

 DIGITAL COUP QUARTERLY ( August to October 2021)

 DIGITAL COUP QUARTERLY ( May to July 2021)

 DIGITAL COUP QUARTERLY ( February to April 2021)